இலங்கை மலைவாழ் மக்களின் காணி பிரச்சினைக்குத் தீர்வு காணும் வழிமுறைகளை எடுத்துரைக்கும் சங்கு கலைக்கழகம் கடந்த மூன்று நாள்களாக வீதி நாடகங்களை அரங்கேற்றியது.
மலையக மக்களின் காணி உரிமை தொடர்பான சங்கு கலைக்கழகத்தின் “நிலமே எங்கள் நிலைக்களம்” சமூக மாற்றத்திற்கான வீதி நாடக ஆற்றுகை தொடர்ந்து நடைபெற்று வருகிறது.
சங்கு கலைக்கழகத்தின் தயாரிப்பில் உருவான ‘நிலமே எங்கள் நிலைக்களம்’ வீதி நாடகைம் பல தசாப்தங்களாகக் காணி உரிமைக்காகப் போராடும் மலையக மக்களின் அவலங்களையும் அந்த உரிமையை
வென்றெடுப்பதற்கான அவசியத்தையும் ஆழமாகப் பதிவு செய்யும் ஒரு முக்கிய கலைப்படைப்பாகும்.
அந்தக் கழகத்தின் வீதி நாடகம் ஜூலை மாதம் 15 ஆம் திகதி முதல் 18 ஆம் திகதி வரை நாவலப்பிட்டி, கல்லாறு, பதுளை, பசறை, அட்டாம்பிட்டி உள்ளிட்ட பல்வேறு பிரதேசங்களில் அரங்கேற்றப்பட்டது.
தித்துவா புயலுக்குப் பிறகும் சொந்த நிலங்களை இழந்த மக்களின் வலியையும், நில உரிமையைப் பெறுவதில் அவர்கள் எதிர்கொள்ளும் சவால்களையும் இந்த நாடகம் மிகத் தெளிவாக வெளிப்படுத்தியது.
நாவலப்பிட்டி பிரதேசத்தில் மாத்திரம் 400 இற்கும் மேற்பட்ட பாடசாலை மாணவர்கள், தோட்டத் தொழிலாளர்கள்,இளைஞர்கள் இந்நாடகத்தை ஆர்வத்துடன் கண்டு களித்தனர்.
பதுளை, பசறை மற்றும் எட்டம்பட்டிய ஆகிய பிரதேசங்களில், ‘எதிர்காலம் எங்கள் கையில்’ என்ற அமைப்பின் ஒருங்கிணைப்பில் தமிழ் மற்றும் சிங்கள மொழி பேசும் மக்களுக்காக இந்த நாடகங்கள்
மிக நேர்த்தியாக மேடையேற்றப்பட்டன. நாடகம் நிறைவடைந்ததும், பார்வையாளர்களுடன் இடம்பெற்ற கலந்துரையாடல்கள், நில உரிமை தொடர்பான சமூக உரையாடலைத் தூண்டும் ஒரு கருவியாக அமைந்தது.
பாடசாலை வளாகங்களில் நாடகம் அரங்கேற்றப்பட்டபோது, அதிபர்கள், ஆசிரியர்கள் மற்றும் மாணவர்கள் நாடகத்தின் அழகியல் அம்சங்கள், கருப்பொருளை எளிமையாக மக்களிடம் கொண்டு செல்லும் விதம் குறித்தும்,
ஒரு சமூக விழிப்புணர்வு நாடகத்தைத் தயாரிப்பதற்கான நுணுக்கங்கள் குறித்தும் தமது ஆக்கபூர்வமான கருத்துக்களைப் பகிர்ந்துகொண்டனர்.
எதார்த்தத்தின் குரலாக… நாவலப்பிட்டி கல்லாறு பகுதியில் நாடகம் நிகழ்ந்துகொண்டிருந்தபோது, பார்வையாளர் ஒருவரால் நாடகம் இடைநிறுத்தப்பட்டது.
உரிமையற்ற இலங்கை மலைவாழ் மக்களின் காணி பிரச்சினை எப்போது தீரும்?
அவர் அந்நாடகத்தை வெறும் காட்சியாகப் பார்க்காமல், தனது வாழ்வின் ஒரு பகுதியாக உணர்ந்தார்.
பெருந்தோட்டக் கம்பனிகளின் அடக்குமுறைகளைத் தனது வாழ்க்கையில் அனுபவித்த அவருக்கு, நாடகக் காட்சிகள் தனது வலியை மீளக் காட்டுவதாக இருந்தன. இருப்பினும், அங்கிருந்த மக்களின் ஆதரவோடு நாடகம் தடையின்றித் தொடர்ந்து சிறப்பாக நிறைவுற்றது.
கடந்த 203 ஆண்டுகளாக சொந்த நிலமின்றி வாழ்வோரின் கண்ணீர்க் கதையையும், அவர்களின் வாழ்வியல், அரசியல் மற்றும் பொருளாதாரச் சிக்கல்களையும் இந்நாடகம் கலைத்துவமாகப் படம்பிடித்துக் காட்டியது.
இந்நாட்டின் பொருளாதாரத்திற்காகத் தங்களை அர்ப்பணித்து உழைத்த மக்களுக்கு, ஒரு அங்குல நிலம் கூடச் சொந்தமில்லாமல் இருப்பது 21 ஆம் நூற்றாண்டில் பெரும் துரதிர்ஷ்டவசமானது என்பதை இந்நாடகம் உலகிற்கு எடுத்துரைத்தது.
மேலும் வாசிக்க: லெனாட்ஸ் தொழிலாளரின் உழைப்பு ஒரே நாளில் சிதறியது
கலையால் கலை எடுப்போம், சமூக மாற்றத்தை நோக்கிய கலாசார அரங்க பயணம்’ என்ற முழக்கத்துடன் சங்கு கலைக்கழகம் மேற்கொண்டு வரும் இப்பயணம் பாராட்டுக்குரியது.
இவ்வாறான சமூக விழிப்புணர்வு நாடகங்கள் உங்கள் பிரதேசத்திலும் இடம்பெற வேண்டுமானால், சங்கு கலைக்கழகத்தைத் தொடர்புகொள்வதன் மூலம், சமூக மாற்றத்திற்கான விவாதங்களையும் விழிப்புணர்வையும் உங்கள் பகுதிகளில் உருவாக்க முடியும்.
மற்றும் இந்நாடக குழுவினர்கள் அவர்களுடைய நாடக ஆற்றுகைக்கு முன்பதாக மலையக மக்களுடைய காணி உரிமை தொடர்பாக அவர்களை தெளிவூட்டும் விதமாக ஒரு துண்டு பிரசுரத்தினை மக்களுக்கு கையளித்தனர்.
அத்துண்டு பிரசுரத்தில் மலையக மக்களுடைய எதிர்கால காணித்திட்டங்கள் எவ்வாறு அமைய வேண்டும் அவர்களுடைய அபிலாசைகள் அவருடைய கலை கலாச்சாரங்கள் பாதுகாப்பு அவர்கள் உரிமைகள் அனைத்தும் நிலத்தைச் சார்ந்தவயாக இருக்கின்றது.
மஸ்கெலியா நிருபர் செ. தி. பெருமாள்