தலவாக்கலையில் அதிர்ச்சி சம்பவம்!
கல்வி கற்று, எதிர்காலக் கனவுகளுடன் வாழ வேண்டிய 16 வயதுச் சிறுமி ஒருவருக்கு, பாதுகாப்பும் அரவணைப்பும் வழங்க வேண்டிய தந்தையே துன்பம் விளைவித்ததாகக் கூறப்படும் சம்பவம் தலவாக்கலை பகுதியில் பெரும் அதிர்ச்சியையும் கவலையையும் ஏற்படுத்தியுள்ளது.
தலவாக்கலை பொலிஸ் பிரிவுக்குட்பட்ட பகுதியில் வசிக்கும் 39 வயதுடைய நபர் ஒருவர், தனது மகளைத் தொடர்ச்சியாகப் பாலியல் துஷ்பிரயோகத்திற்கு உட்படுத்தியதாகக் குற்றஞ்சாட்டப்பட்டு கைது செய்யப்பட்டுள்ளார்.
சிறுமி பல வாரங்களாகப் பாடசாலைக்கு வருகை தராததை அவதானித்த பாடசாலை அதிபர், மாணவியின் நிலைமை குறித்து சந்தேகமடைந்து, சம்பவம் தொடர்பாகத் தலவாக்கலை பொலிஸாருக்கு அறிவித்துள்ளார்.
அதிபரின் இந்த அவதானிப்பும் உரிய நேரத்தில் மேற்கொண்ட நடவடிக்கையும், சிறுமி எதிர்கொண்டதாகக் கூறப்படும் துன்புறுத்தல் தொடர்பான உண்மைகள் வெளிச்சத்துக்கு வருவதற்கு வழிவகுத்துள்ளன.
இதனையடுத்து, சிறுமி, அவரது தந்தை,தாயார் ஆகியோரைப் பொலிஸ் நிலையத்திற்கு அழைத்து பொலிஸார் விசாரணைகளை முன்னெடுத்துள்ளனர்.
அப்போது, தனது தந்தையால் தொடர்ச்சியாகப் பாலியல் துஷ்பிரயோகத்திற்கு உள்ளாக்கப்பட்டதாகச் சிறுமி வாக்குமூலம் அளித்துள்ளார்.
இதனைத் தொடர்ந்து, சந்தேகநபரான தந்தையைக் கைது செய்த பொலிஸார், அவரை நுவரெலியா மாவட்ட நீதிமன்றத்தில் ஆஜர்படுத்தியுள்ளனர். பின்னர் அவர் விளக்கமறியலில் வைக்கப்பட்டுள்ளார்.
பாதிக்கப்பட்ட சிறுமி மருத்துவப் பரிசோதனைகளுக்காக நுவரெலியா ஆதார வைத்தியசாலையில் அனுமதிக்கப்பட்டுள்ளார்.
ஒரு குழந்தையின் மௌனத்திற்குப் பின்னால் சொல்ல முடியாத துயரங்கள் மறைந்திருக்கலாம்.
பாடசாலைக்கு வருகை தராத மாணவி தொடர்பில் அதிபர் காட்டிய அக்கறை, சிறுவர்களின் பாதுகாப்பில் பெற்றோர், ஆசிரியர்கள்,சமூகத்தினர் கொண்டிருக்க வேண்டிய விழிப்புணர்வின் முக்கியத்துவத்தை மீண்டும் உணர்த்தியுள்ளது.
குழந்தைகளின் பாதுகாப்பு என்பது குடும்பத்தின் பொறுப்பு மட்டுமல்ல; அவர்களின் நலனில் அக்கறை கொண்ட ஒட்டுமொத்த சமூகத்தின் கடமையுமாகும்.
இச்சம்பவம் தொடர்பான மேலதிக விசாரணைகளைத் தலவாக்கலை பொலிஸ் நிலையப் பொறுப்பதிகாரி, பிரதான பொலிஸ் பரிசோதகர் நளின் திசாநாயக்கவின் அறிவுறுத்தலின் பேரில், உப பொலிஸ் பரிசோதகர் திலகரத்ன, பெண் பொலிஸ் சார்ஜன்ட் மருதநாயகி, பெண் பொலிஸ் கான்ஸ்டபிள் பிரதீபா ஆகியோர் முன்னெடுத்து வருகின்றனர்.
கௌசல்யா